ओमप्रकाश वर्मा जी की चर्चित कविता
हमन छत्तीसगढ़िया किसान
हमन छत्तीसगढ़िया किसान
सबे जीव हमर हे मितान।
धरती दाई के सेवा ल करथन
मेहनत कर अन उप जाथन।
नागर बैईला हमर चिन्हारी
खेती खार हमर जिन्दगानी।
नई मारन हम झुठ लबारी
दया मया के हे कलेजा भारी
पहुना ल हम देवता मानथन
आनी बानी के नेवता करथन
ये भुईयां के हम पुजारी आन
अही म हे हमर परान।
धान चना राहेर उपजाथन
आनी बानी के साग उगाथन।
छोटक कुरीया म रात पहाथन
होत बिहनिया खेत जाथन।
बेरा उतरत घर आथन
अपने अपन म मगन रईथन
ज़िंदगी अपन गढ़त रईथन।
पढ़ाई लिखाई अब सीखत हन
सही ग़लत ल समझत हन।
नवा इतिहास अब गढ़त हन
पहचान अपन बनावत हन
मेहनत करके आगु बढ़बो
धरती मां के सेवा करबो
छत्तीसगढ़ बड़ खान हे
जेकर लईका सब महान हे।
———————————
जय जय हो मोर छत्तीसगढ़ महतारी।
ओमप्रकाश वर्मा
सेमरताल, बिलासपुर, छत्तीसगढ़
About The Author
